繼徐熙娣（小S）嫁人兼生咗個女之後，𠵱家同仔仔周渝民拍緊拖嘅徐熙媛（大S），成日唔係被傳結婚就係傳佢有咗，前日小S出席台灣某瘦腰產品嘅宣傳活動，既冇否認大S懷孕嘅傳聞，但又話自己有再懷孕嘅迹象，認真識吸引記者。
贊成未婚懷孕
大S噚日喺台灣出席一個產品記者會，將呢個話題繼續發揮，佢話自己好贊成未婚懷孕，佢咁講，令佢係咪有咗嘅傳聞，顯得更加撲朔迷離。其實大S之前就曾經用未來奶奶唔批准佢同仔仔拍拖嚟做新聞，跟住又話搞掂咗未來奶奶，聖誕可以同仔仔一齊慶祝，然之後又輪到用結唔結婚嚟做話題。馮仁昭覺得台灣女藝人博見報嘅宣傳伎倆真係冇得頂，大小S兩姊妹就係當中嘅表表者，香港女藝人真係要學吓嘢。
