周六英超又一輪快車，係8日內第3場，體力少啲都頂唔住；相對上連打兩場主場嘅球隊，避免舟車勞頓，體力恢復點都比連打兩場作客嘅球隊好，周六英超就有呢兩類球隊交鋒，韋斯咸迎戰曼城，捧硬主隊！牽牛
古比士利果然有料到，接手韋斯咸後，立即主場打低曼聯，「拆禮物日」對樸茨茅夫，雖然以1:2見負，但因為有隊長李奧曲卡停賽，影響甚大，今次可以畀多次機會佢；講真古比士利又唔識變魔術，轉會市場又未重開，唔可以增兵，點解可以短時間搞番好隊波？其實最緊要係古比士利重用土炮。好似一對箭頭希活同森莫亞，講腳法真係同泰維斯冇得比，不過佢哋就勝在夠落力，失波後肯迫番對手，保耶更有重生感覺；呢位出身查爾頓嘅中場，重遇番古比士利，立即得到重用，係韋斯咸右路助攻助守不可或缺嘅棋子。
李奧曲卡復出
當然重用土炮仲有一個好處，就係佢哋習慣晒快車期，知道體力點樣留放，唔似得外援咁，連拼一兩場就亁晒，加上李奧曲卡復出，可以唞足精神中場掃蕩，加比頓復出後，後防都叫穩陣番，就算有左閘高捷斯基停賽都唔怕。
曼城呢幾日賽期真係麻煩，「拆禮物日」就先作客中部嘅錫菲聯，休息3日後，今次又要南下倫敦，見班球員聖誕佳節都要走來走去，真係身心俱疲；特別係曼城陣中外援，好似哥拉廸、查比斯，都係第一年打英超，未必認識到快車期的辛苦法，「後生仔」米卡李察士又剛好番不久，兼有傳將投車仔，連場拼搏幾當打都「莫氣」啦；講真曼城上仗作客贏錫菲聯，終止3連敗，已經算有交代，今仗更加有中場祖爾巴頓停賽；我就唔信曼城可以作客兩連勝，韋斯咸讓平/半，半個盤博一個盤去賭。
赫斯平手盤咪中招
冷門推介，博蘇超賽事，基爾馬諾克主場贏赫斯；論名氣，赫斯比基爾馬諾克高幾班，而且赫斯上仗贏喜伯年3:2，好似好有說服力，今次莊家開個平手盤，擺明引人買赫斯；呢啲陷阱盤見唔少，一於平手盤博主隊。
投資特攻隊金句
曼城呢幾日賽期就真係麻煩，「拆禮物日」就先作客中部嘅錫菲聯，休息3日後，今次又要南下倫敦，見班球員聖誕佳節都要走來走去，真係身心俱疲。