工業總會名譽會長梁君彥噚日宴請傳媒，回顧一年嚟嘅工作，特別提到為咗珠三角同香港有一片藍色天空，政府花兩億銀都係值得喎。
佢話，喺推動環保工業嘅最新搞作，係藉生產力促進局喺深圳同東莞做緊個環保示範中心，畀當地嘅香港廠家試用減少空氣污染嘅環保設備，將會試驗幾個月，如果成功，會向政府申請撥款2.1億元，推動珠三角7萬幾家香港廠商，利用環保設施。
工總認為，本港工業嘅出路，一定係朝住設計品牌方向發展，以往港府向本港出入口商，徵收萬分之2.5嘅貨品稅率，作為推廣香港外貿，涉及金額10億元。
不過，早幾年經濟唔好，政府只將其中3億銀，用作推廣外貿，餘錢撥入政府一般收入。
新一年，佢希望政府恢復呢筆稅金嘅用途，用嚟推廣港製貨物嘅品牌。