許志安昨日代表「許志安國際慈善基金會」出席奧海城舉行的燃亮生命慈善行動，是次活動徽章由安仔設計，他將一根火柴融入基金會會徽內，象徵幫助別人燃亮生命。安仔在活動上與十多名小模特兒行catwalk及義賣慈善T恤，他呼籲身邊好友蘇永康及張衞健等出錢出力，又承諾包底，為無國界醫生籌夠六位數字善款。
攞獎當遊戲
基金會成立數個月，已第二次為慈善團體籌款，安仔透露下個目標為老人家籌款，眼見小模特兒及小司儀精靈活潑，安仔會否恨做爸爸？他說：「想，好想，頭先出場個個對眼都大過我，將來小朋友唔好似我個鼻就得，如果個女跟我個鼻就弊。」安仔謂將來生仔或生女也沒有所謂，最緊要是自己的兒女，現時他寄情與哥哥的囡囡玩。
安仔於新城頒獎禮奪得兩個歌曲獎，至於會否出席其餘頒獎禮則是未知之數。對於前公司正東及環球傳因不滿賽果缺席頒獎禮慶功，安仔說：「當一場遊戲啦，可能各有各忙，唔好睇得咁重要。」他認為應以玩樂心態參與。
採訪、攝影：馬建華
