港股連續大升兩日，恒指一舉而衝破20000點大關，成交就略有增加，不過升降指數仍呈弱，唔計認股證嘅下跌股超過440隻，比上升股的364隻為多，散戶繼續沽出冇表現嘅股仔，集中火力炒輪同中資股。
內地地產股大升後，輪到5行3保，跟住到邊瓣？芬佬線來料話電力股可接力而上。噚日最威水係大唐發電（991），最高8.25元，收8.15元，升5.3%，相信好快可以挑戰早前8.40元嘅高位。
大唐有大行睇好，但芬佬更心水嘅反而係中國電力（2380），佢話呢隻係未來4年電力股中「晒士」擴大得最快嘅，股價升幅亦會更大。
過去兩個月，大唐由5.30元升上8.25元，升幅55.6%；相比之下，中國電力由3元起步，上月中曾升上4.63元，但噚日都只係收4.17元，只升得30%。
經營規模持續擴大
中國電力在04年10月上市，最吸引嘅係公司每年都會進行一次注資，擴大經營規模。上市時集團應佔權益的裝機容量係3010兆瓦，經過05及06年兩次注資後，現時裝機容量已上升到5300兆瓦，公司已有計劃，在08年底時，應佔權益的裝機容量將會大增到10000兆瓦。
集團繼去年收購神頭電廠，及今年收購A股上市公司上海電力25%權益後，明年有機會收購的項目，將包括母公司旗下的遼寧青河電廠，另外在建中電廠3間，將分別在07至08年完成，實益佔裝機容量3516兆瓦，相信可輕易完成10000兆瓦的目標，而在兩三年內裝機容量可升逾倍的，在現有電力股中，難有如此強勁表現。
由上月中開始，中國電力股價在4元至4.20元間橫行，保歷加通道已大為收窄，MACD短期內亦會出現雙牛入貨訊號，升勢隨時會發動，短線上升目標4.75元，只係追番大唐的升幅。
郭兆誠