張藝謀嘅老拍檔、電影《滿城盡帶黃金甲》投資者兼製片張偉平，早幾日鬧完周潤發同鞏俐兩位巨星唔去內地宣傳後，繼續咬住唔放，日前又同傳媒爆料，話發哥拍呢部戲時耍大牌，凡事都要求荷李活規格，堅持要住全北京最貴嘅國際俱樂部飯店，指發嫂以發哥經理人身份要求七間房間、又唔食大鍋飯、開工要有私人休息車、每日工作唔可以超過12個鐘，片酬又要超過700萬美金（約5,500萬港元）。
回罵賈樟柯
張偉平就話呢啲咁嘅要求令佢頂唔順，佢話：「他把自己當荷李活明星，但荷李活把他當甚麼？還不是回來拍華語片了。」不過馮仁昭覺得如果佢認為發哥要求過份，點解仲要搵佢合作呢？既然肯簽約答應晒人哋嘅要求，做乜又去唱衰人呢？
燒完一個火頭，張偉平又去辣《三峽好人》導演賈樟柯，因賈導演公開話過張藝謀唔識拍古裝武俠片後，最近又話觀眾睇戲判斷力好差，明寸《黃金甲》票房咁火紅。問番張偉平點睇，佢就話：「我都懶得搭理他，他那個片子不就是拿了一個金獅嗎？我們又不是沒拿過，都是我們拿剩下的，他的電影是威尼斯影展主席投資，他們在玩貓膩（扯貓尾）。」
