年關將至，又係賊仔活躍嘅時間，警方經常提醒市民要小心財物，先嗰排油麻地地鐵站，就有人㩒機攞錢嗰陣，俾人喺後面扑頭搶錢。近排網上流傳一個講法，如果你被匪徒威迫輸入提款密碼，可以用倒轉輸入方式間接知會警方，例如密碼係1234，你就輸入4321，提款機識別到你以倒轉方式輸入密碼，會按你指示照出銀紙，但同時會喺匪徒不知情下知會警方。
網友sainet將呢個方法鋪上《香港討論區》，仲話啲資料喺電視上都公開過，但因為好少人知，所以唔係咁多人用過。佢想問吓有冇人試過，係唔係真嘅？
好多網友都話未聽過，christo_ng就勸大家咪用，「免得到時俾賊佬捅多兩刀。如果係真，銀行一定會同客人講，點會好似𠵱家咁，連大家做銀行嘅都未聽過？」
遭挾持㩒錢冇解救
christo_ng講得好有道理，我哋問過某間銀行嘅發言人，佢話都有聽過網上流傳呢個方法，所以佢哋銀行保安部同事親自去試過，結果提款機只顯示密碼不符，攞唔到錢，更加唔見有警察嚟。