繼中國人壽（2628）升到你唔信之後，H股巨無霸工商銀行（1398）噚日爆升咗十幾個巴仙，揸咗嘅固然笑到合唔埋口，無揸嘅就惟有痛恨自已喺4蚊頭無追貨，眼白白咁睇住佢唔識停咁升升升。喺內地網站《網易》嘅討論區，就有好多網民熱烈咁討論呢隻「火箭」。事關工行A股早幾日已升穿5蚊（人民幣．下同），噚日再升3.09%，收報5.68元，但H股同A股仍有一段距離。
首先，等我哋聽好友方面嘅意見。一名無署名嘅網友話：「工行是世界第5大銀行，（1股）連1美金都還不到，快買吧！」另外一名不具名嘅網友仲誇張，「工行合理價為25元，還要再翻多兩番……20元以下爺爺堅決不賣，賣了就是眾人的孫子，是龜孫子！」
20蚊以下死攬唔放
至於淡友陣營，一名無透露名稱嘅網友話：「指數股堅決不買，看能拉到（挾）甚麼位置，不信它不跳水！」仲有一名自稱係工行員工嘅網友話：「我是工行員工，告訴你們工行很空，業績不佳，應該警惕了！」另一名網友更直接，話其實只有基金同證監會唔知道。
工行H股喺10月中上市嘅招股價係3.07港元，以噚日收4.98港元計，唔夠兩個月已升咗60%。唔知仲揸緊嘅人今日會點做呢？