好友呢一鋪，真係食到盡。長假後復市，亦都係期指結算前夕，港股又以雷霆萬鈞之勢，大升特升，指數全面創出新高，恒指收19725，大升405點；H指更犀利，唔單止一次就升破1萬點大關，仲係急升665點，高收10258，內地5大銀行同3大保險股，升到你唔信。
大市新高，好值得開香檳慶祝，但升得咁急，成交卻未能配合，只得484億元，而唔計認股證嘅下跌股又遠比上升股為多，升降指數轉弱，已經好幾日；大牛市乃千載難逢，亦係賺大錢好機會，但新高市勢中已隱藏危機，搏殺應該，但小心更重要。
上月底，推介中信資源（1205），當時股價1.69元，噚日已升到2.21元，且近兩日成交大增，明顯係有大盤，特別係基金在吸納，推介時睇目標價係2.40元，好快會到。
中信資源係中信集團旗下能源及天然資源嘅旗艦公司，現時在中國及印尼擁有油田項目，母公司最近出手收購哈薩克斯坦油田（佔94.6%），若完成交易並注資，中信資源將搖身一變成為中國第4大石油公司。基金近日買盤積極，不會無因。
據熟悉內情嘅人士指出，收購哈國卡拉贊巴斯油田的交易，短期內完成的機會極大，條件之一係哈國政府會擁有一部份股權，而中信資源則獲安排擁有不會少於51%的股權。
基金買盤積極
哈國油田的收購代價為19.1億美元，根據外資行估計，在扣除因收購而出現的債項所引致的利息支出後，每年盈利估約有2億美元（約15.5億港元），中信資源若獲注入控股權益，每年盈利將不少於8億元。收購完成後，PE將會降至個位數，相當吸引。
同係石油股嘅中油（香港）（135），今個月初曾推介，噚日收4.45元，升6.2%，大行看好，短線仍可以4.75元為上升目標。
郭兆誠