信用卡可以用嚟購物消費，仲可以用嚟交稅同交雜費，好多銀行又定期推出各式回贈、獎賞、折扣或免息分期等甜頭，唔少人為賺盡優惠而頻頻碌卡。
喺《MSN》討論區，MoneySavvy引述一篇報道指，家陣啲人乜都用信用卡找數，好多人甚至每年賺到機票去外國旅行，佢想知道係咪好多網友有類似經驗。alaskagurl率先回應指，佢每年都會利用有關優惠同屋企人出外度假，但強調一定每月還清欠款及設定簽卡預算，否則得不償失。
schildi亦認同，話碌卡消費只要有節制，不超支欠債，真係分分鐘有錢賺。LivingBig就話，碌卡只不過係將找數時間延遲，其實係考卡主嘅現金流管理有幾叻啫，所以千祈咪用嚟買無法負擔嘅嘢。
認清遊戲規則 唔做「負翁」「負婆」
正所謂「水能載舟，亦能覆舟」，信用卡嘅「先使未來錢」觀念確令好多不善理財嘅人，身陷萬劫不復之地，變成「負翁」、「負婆」，但只要識得遊戲規則，要攞着數話咁易。《MSN》理財區就公開幾招致勝之道，包括：每月檢討月結單，搵出最常花費嘅類別，再查吓邊張卡嘅推廣優惠最切合自己嘅消費模式；仲要留意信用卡有冇豁免年費，將冇用嘅卡取消，建議最好唔超過3張卡；如果有卡數未清，就千祈咪再碌嗰張卡，因為新簽賬項目都計息。
另外，為免一時忘記找卡數而被罰，最好自動轉賬，最重要當然係唔好「使凸」啦！