聖誕假期不出外旅遊，留港有乜好節目？不外乎飲飲食食，麻將耍樂，到馬場做善事。左丁山放假前，喺寫字樓拎咗兩大袋報紙剪報返屋企，預備在四日之內睇晒。點知星期三返工，兩大袋報紙紋風不動咁拎返寫字樓，做咗物流運輸業㖭。
十二月二十四日晚食完大餐之後，第二朝一早被電話嘈醒，原來親戚召集，大家同意唔去市區趁熱鬧，反其道而行之，到上水雙魚河馬會會所食戶外「大排檔」。於是十一點幾開車，假期吐露港公路冇乜貨車、貨櫃車，揸車係賞心樂事，好快去到古洞路轉左入金錢村，馬會會所之前有一條小路，小路旁係一個大豪宅，外面有近半里路長嘅鐵欄阻止外人擅進，相信裏面有不少大型住宅單位，汽車經過一個金碧輝煌嘅大型鐵欄，以為係大閘入口，點知向左一望，唉吔，原來係一個大墳墓。細路豪立即問，點解豪宅花園內有墳墓向住馬路？冇人識答。再過幾十呎，出咗豪宅範圍，左邊山坡又有一個大墳墓，不過呢個墓就冇之前嗰個咁輝煌咯。
豪華屋苑內有別人祖宗墳墓，究竟係唔係好風水，有機會問吓啲業主先，如果係同屬一個祠堂，應該冇問題啩？好嘞，入到馬會舊會所，遇上陽光普照，風和日麗，坐在戶外食德國鹹豬手、咖喱雞飯、牛腩麵，真係一樂也。呢度夠晒寧靜，食完再 四處遊覽，到花園散步，啲細路就踏單車，唔少家庭三代同堂，在此同樂。唔怪得孫公孫太都抱住個孫，滿面笑容，本來想埋去講句聖誕快樂，回心一諗，孫公呢輪俾天星碼頭煩到痹，跟住又要清拆皇后碼頭，無謂打擾人哋家庭樂啦。
唔同孫公打招呼，有人叫一聲左丁山午安。原來係地產經濟師M，與太太及小孩來此享受太陽。經濟師M身形瘦削，打工多年，居然肚腩全無，可算奇蹟，問佢腰圍，佢話：「28吋，與大學生年代相同！」真係服咗佢，邊度有人畢業咁耐，仲可以維持大學生身段㗎，左丁山畢業後一年，已經與28吋腰圍講拜拜，𠵱家有幾肥？唔話你知。