前大摩亞洲首席經濟師謝國忠雖然已經離職，但就冇停過喺媒體發表評論文章，最近佢就中國面對全球貿易前景不確定、國內消費不足、就業不足、環境惡化同自然資源匱乏等難題，提出一個獨特嘅解決方法，就係喺國內建立20個超級大城市，每個人口達5000萬人，遠高於𠵱家上海嘅1900萬人同北京嘅1600萬人，亦較紐約同洛杉磯嘅1000萬人口更多；相當於將全國八成人口搬入呢啲超級大城市內。
佢話，呢啲超級大城市具有好大嘅規模經濟效益，工人嘅生產能力更高，僱主會願意請更多人；而且人口高度集中，一般蝕錢嘅城市基建及交通設施，好似地鐵、淡水供應咁，都會有錢賺，政府就可以減少汽車喺路面行駛，減少污染。聽落似乎好理想，但謝生冇乜提到呢類超級大城市又要面對啲乜嘢問題喎？