噚日中資金融股急升，普遍升幅介乎9%至13%，不少持貨嘅散戶表示好興奮，更指國企指數升幅驚人。《Uwants討論區》內，有網友問現時「五行三保」最好炒邊隻？45%網友指會炒工行（1398），因為銀行股比較穩陣；18%話會炒交行（3328），15%人會炒國壽（2628），13%人則炒中行（3988），而建行（939）約佔8%。從調查可見，大多數網友認為工行及交行最值博，料短期仍有可觀嘅升幅。
網友E-Sky話：「我會選工行同交行，因為佢哋升值潛能大，特別係交行，就快發Ａ股，有排玩。」網友A股市狂迷非常睇好國壽前景，笑言：「Ａ股上市時大陸佬瘋狂搶購，將會令H股急升，好有信心國壽短期內會見30元。」
不過，另有人擔心今日期指結算，會成為大戶借勢壓價嘅藉口，網友gw007建議：「現時中資金融股升幅都脫離基本因素，高追嘅散戶最緊要睇位落車，定止賺位。」