當美國、歐盟、日本每年經濟增長都唔過5%嘅時候，中國就錄得8至10%升幅，遲早變超級強國。如果唔係阿爺千方百計㩒住慢慢嚟，可能升得仲多。雖然祖國發展勢頭咁好，但網友ppk463就有啲杞人憂天，「我對經濟完全不懂，但直覺感到很不安，現在人民幣升值好似有啲唔理性，因此想聽吓資深人士意見。」
於是喺《香港討論區》發起「大陸經濟泡沫會幾時爆」嘅投票活動，叫資深人士畀吓意見。結果有14個網友投票，5個覺得一年內會爆，3個揀兩年，揀三年就有兩票，但有4票揀泡沫喺五年內都唔爆，似乎冇邊瓣特別多人buy。
可能網友pkkpeter喺內地有生意，佢似乎對祖國民情非常了解，佢話：「你親自去大陸睇過，就知發展有幾快！」Revw就信數字決定一切：「我對經濟都係完全唔懂，但全世界八成產品都係madeinChina，我真係睇唔到泡沫囉。」大好友破軍仔仔仲預言：「個人認為內地嘅經濟仍處於高增長期，15至20年內應該仲會好好。」
有外滙管制 大鱷操控難
不過，網友亦唔係一面倒唱好，hkanthony明顯睇淡，「𠵱家大陸經濟太crazy，數月內應該會爆。」simonchan082006就話，宏調起咗作用，就算有少少泡，都係啤酒泡。其餘意見都係審慎樂觀居多，Daizin度晒橋話：「內地政府會宏調、用外滙，就算爆，都唔會爆好多。」
東泰證券研究部董事鄧聲興話，97年亞洲之所以爆發金融風暴，係當時香港同東南亞地區都靠槓桿借貸炒股市同樓市，推得太高實死。不過，𠵱家中國外滙儲備過萬億美元，對外貿易盈餘多到不得了，固定資產投資又不斷增加，整體通脹只有1.5%，喺全世界嚟講算係好低同好正常。最緊要嘅係，祖國有外滙管制，人民幣唔係自由兌換，滙率無可能畀外資大鱷操控，更遑論出現經濟泡沫。
佢又話，即使美國經濟唔好彩「硬着陸」，都未必拖累中國經濟，因為內地產品始終較平，美國人窮可能買更多平貨。