台資嘅裸銅線同電磁線製造商台一，今日開始公開招股，下個月11日掛牌，勢成明年首隻上市嘅新股。保薦人寶來證券總經理黃齊元，對呢隻新股寄予好大期望，希望佢嘅上市，好似台灣前晚嘅地震一樣，為本港股市帶來天搖地動嘅影響力。
佢又預言，07年台資企業嚟香港上市嘅數目，會比06年多，都係拜台灣嘅總統阿扁所賜。
佢話，阿扁只搞政治，對台灣經濟幫不了忙，仍然限制台商企業喺大陸投資規模。最近就有一家喺台灣上市嘅大型台資公司日月光，用腳投票，決定自動撤除台灣上市地位，再考慮轉往其他地區上市。嗰間公司做半導體封裝設施，市值達60億美金，佔台灣股市市值1%。
佢話，台灣政府感到好冇面，正積極游說日月光，希望佢哋唔好除牌。