番鬼佬新年衝緊埋嚟，所謂年近歲晚，大家又有藉口食餐好嘅！新近大裝修嘅荃灣廣場有家新進駐嘅「滇家菜」；「滇」即係雲南簡稱；新菜有個富貴豆腐，一嚿爛豆腐可以玩到幾富貴？加金箔？珍珠磨粉？當然唔會咁膚淺啦！
記者：朱崇德
攝影：何家亮
Model：Isabell
高原菜 食到滾熱辣
專攻雲南料理嘅舖頭，反轉成個香港都係得十間八間；要知雲南菜特色，要先知道當地水土氣候；滇處於中國西南，與緬甸、寮國、越南三國接壤，聽落應該幾熱吓；不過雲南高原山地佔了全省面積90%以上，平均海拔高於1,000米，當地人有謂「山高一丈，大不一樣」的一山四季氣候，如四月時山腳極熱，山腰則如春，山頂卻大雪紛飛。
滇家菜老闆兼行政總廚話：「由於天氣凍，所以菜式多數味重、多油兼極辣，開舖前曾親身到雲南大城小鄉試菜，好味但難以下嚥！所以轉到香港做，緊守係味道、香料，全部都係親到雲南辦貨，就連廚房師傅都係遠道從雲南請來，不過辣、鹹、油都降低不少，為照顧香港人的飲食文化。」
富貴豆腐$60
雲南高原位處高山深谷，由於交通不便，故食材物資都幾缺乏吓，所以多以野菜、野菌作菜；這味富貴豆腐，精緻之處是將當地最上品的雲腿，釀入極軟身的豆腐當中，再以「貴價」的香炸瑤柱灑面（雲貴高原只有湖，所以瑤柱要靠進口）；豆腐吸收了雲腿香鹹之氣，鹹淡得宜，面層的豉椒汁，亦帶出惹味，最誘人是炸得甘脆的瑤柱，增強了豆腐的口感。
葱燒海參餌塊$68
餌塊是以大米製成，屬雲南地方小吃，相傳明末永曆帝為避吳三桂，餓寒逃難至雲貴，村人以此充飢，故有大救駕之別稱。呢味葱燒餌塊，比上海年糕多份軟滑！
家鄉糯米蝦$52
雲南傳統製法是以河魚配糯米飯，但河魚骨多難食，嚟到香港改以中蝦！生炒糯米飯溫心暖胃已經合晒時令，上枱時先將鮮蝦連飯在你面前兜熟，飯香、蝦鮮！
生炒麻辣雞$55
生炒麻辣雞是雲南的地方菜，加有指天椒、青紅椒、金不換等惹味香料，還有細如蠅頭的「川麻椒」，吃上半口，包你口腔至脷根麻上5分鐘，嗜辣者必愛死此菜。
紅燒羊蹄煲$65
紅燒羊蹄唔係太多地方有！以薑、葱、冬菇、豉油輕扣，汁料入口唔膠但極度入味！羊蹄基本冇「肉」，皮滑冇油脂，皮下包裹的是彈牙爽口的羊筋，膠質重又滋補。
食神評級
食物︰★★★★
環境︰★★★
服務︰★★★★
讚：香料、食材好多都係自己從雲南入貨，正宗雲南地方風味。
彈：雖則已「減辣」，但仍然唔講得笑，唔食辣者，點菜前真係要講明。
睇路搵食
滇家菜（35763660）
地址：荃灣大壩街4-30號
荃灣廣場地庫B109-B110
座位：110個
營業時間：11:00am-11:00pm
