噚日，我哋特區同全世界嘅互聯網斷晒線，上網都只可以去一啲特區作為基地嘅網站。而喺非特區嘅離岸網站，聽聞都只有sex141.com運作如常，如果唔係知道佢一定要離岸運作，真係有機會誤會佢個網站喺特區營運。不過，因為噚日孫柏文冇辦法上網搜羅資料，所以今日就冇辦法為大家作深入嘅分析。
今日出街嘅《金手指》文章，可能有比較多嘅「水份」，比較多「吹水」，大家甚至會覺得我今日有呃稿費之嫌。如果大家有呢啲感覺，我亦借呢次機會向大家道歉。大家聽完道歉說話之後，可能會問：「咁同平時有冇分別？」絕對有！平時我呃稿費嘅時候，冇嘢好賴，所以只會好似一個響擠滿咗人嘅電梯裏，放咗篤無聲屁嘅人一樣，希望就算有人覺「出事」，都冇人會出聲鬧個「經手人」。不過今次唔同，有嘢賴，所以我就可以好大方咁同大家道歉。
不過，大家寫信來之前，我問大家一句：「你覺得個市仲有得分析咩？如果我叫你唔好買、唔好入市，你會聽我話咩？」呢個大升市，特別係國企H股指數，已經到差唔多高潮，不過最弊係男性高潮，亢奮完就好快會平復，甚至會瞓覺，叫極都唔醒。喺12月19日，當時H股指數大約9139點，12月剩下七個交易日，我曾經同大家講過，市場氣氛令我相信H股指數極有可能學03年咁，喺12月一個月內升25%，H股指數就會升到10700點。計埋今日，仲剩兩個交易日，大家不如將疑慮盡釋，狂歡埋佢！跌市出年先至理！
悼念福特
最後，今日我想悼念啱啱去世嘅前花旗國總統福特GeraldFord，佢除咗係花旗國總統之外，亦都係我嘅學友。當年福特總統係我母校美式足球隊成員之一（GoBlue！），所以身材非常魁梧。記得有一次，我喺大學周圍「探險」嘅時候，我走咗入去福特總統喺大學校園設立嘅總統圖書館。裏面掛咗一幅有一個人咁大嘅照片，照片係喺75年福特總統訪華嘅時候拍攝。照片主角就係福特總統同解放香港嘅小平同志。雖然，福特總統高過小平同志成個頭，不過論氣勢，小平同志絕對勁過福特好多倍。所以身形同管治能力真係冇乜關係。