香港人坐飛機往返大陸，遇上航班誤點，真係閒過立秋，好彩，內地民航總局終於有意作出改善。局長楊元元，前日響全國民航工作會議上，話要建立制度，將航班正常率與航線經營權掛鈎，若航空公司經營某條航線或航班，喺規定時間內，平均延誤率高或延誤時間長，民航總局就會取消其經營權。
局長冇講明，呢個制度係咪淨係適用於內陸航線，定係中港航線都包埋。但無論點，民航總局肯出招，要航空公司自律守時都係好開始。
但中港航班經常塞機，其實主要原因係空中交通擠塞，一班機遲，好易造成骨牌效應，加上內地主要機場，有時又話要進行軍事演習，唔准航班升降，航班又點會唔誤點。故此，單係航空公司自律，未必可以解決誤點問題，還要各方加強協調先得。