市道好，沒有急景殘年之象，大家臉口特別祥和。每個人習慣向好的方面看，事事積極樂觀，正能量爆棚。所謂謀事在人，成事在天，天人合一在乎心態健康，萬眾一心，化腐朽為神奇。人的信心指數一旦進入安全範圍，幾惡劣的環境都能強勢硬撐落去，不必風水佬打救，唔使睇心理治療，拍拍心口，滿懷信心迎向二○○七。
活躍多年的風水佬和專業走俏的精神科，將會在來年坐冷板，這確是社會的大福音。風水師傅過往搵得多，就算食幾年穀種，相信也不致餓死，不會伸大手板問政府拿綜援。精神科醫生的確供不應求，香港人生活態度繃緊，精神多少有點「事幹」，所以每年睇精神科，應該列入身體例行檢查的範圍，年年驗神經，令自己和別人放心。政府高官必須將驗腦評估報告公開，等市民知道哪一位高層「黐黐哋線」，無謂跟他上綱上線糾纏。
經濟一好，做官的也易辦得多。左拆右拆掩眼法一招就夠，市民掛住入市，賺了又掛住消費獎賞自己，得閒諗去邊個resort度假歎世界，香港拆了個翻天覆地也不太上心。有錢，到哪裏懷舊都得，公民教育話齋，志在四方，集體回憶阻手阻腳，年輕人咁多包袱，點會發達。來年2007，跟007沒有裙帶關係，香港人做主角的這套戲，唔需要打得，是吵吵鬧鬧炒埋一碟的C級倫理片。