今年個市旺咗好多，睇吓聖誕節幾多港人外遊就知，旅行社仲話「貴價團」一早就爆晒，留喺香港嘅人消費都好手鬆，睇吓啲商販幾開心就知，好耐都冇見過呢個情景。
好嘅市況會持續幾耐？冇人知。不過，港人都捱咗好耐，呢個經濟復蘇周期應該唔會咁快完，雖然貧富懸殊好難會有改善，但係富有嘅人富啲，窮嘅人冇咁窮，就已經好好，唔好互相比較，咁樣妒忌、仇恨都會少啲，人嘅生活都會快樂啲，趁住聖誕同新年呢個普天同慶嘅時間，祝大家有愉快嘅生活，咁樣炒窩輪嘅時候都會更加得心應手。
本周大市嘅焦點在期指結算同年結，今日係長假後首個交易日，亦係結算前夕，好淡雙方會博到盡，點博法，就要睇美股同日股點走。
期指搏殺，相信現貨市場會搞住啲主要指數成份股，如果大家冇玩期指同指數窩輪，咁樣嗰啲股票可能唔會係大家注意嘅目標，咁會注意啲乜？先兩日都講過，國內銀行同保險股會繼續係炒賣熱點。
建行C輪6063：建行（939）上周五報收4.62元，股價沿住短線陡斜嘅通道炒上，但拉闊啲嚟睇，斜度都係45度角左右，有勁但唔會太危險，技術走勢好靚，上日因為假期氣氛成交縮咗，今日炒上成交應會增加，短線可望升上5元至5.20元，啲C輪可以諗諗。
建行C輪6063上日報收42仙，槓桿率11倍（有效6倍），對沖值0.54，正股升上5元，6063應該喺63仙樓上，正股升上5.20元，隻C輪應該逼近80仙，正股跌穿4.45元止蝕。
俊樺