聖誕節期間，中國一連串影響金融市場的消息如雪片飛來，可以肯定是真的，有國家財政部繼去年補貼中石化（386）94億元後，今年再有50億補貼，目的為填補該公司在煉油方面為國家承擔通脹風險帶來的虧損，其實沒甚新意（其他國家也有類似政策），不知怎的用來作為炒作藉口？
另外談了兩年的所謂兩稅合一──國內和外資企業所得稅，有望於2008年1月1日全部一視同仁繳交25%稅。這對大型國企（目前交33%稅）無大利益，對中小企並無着數（部份享受20%照顧稅率），反而對外資稍有影響（不過你同佢定，大把「橋」避稅兼賺回）。
綜合而言，稅率併軌乃邁向國際之國策，其實早已流傳，如果落實，當然可喜可賀，但亦不致炒到飛起，何況08年才實施？
國企炒到飛起
還有國家信息中心發表報告預測，人民幣滙率明年將升3%至4%。係人都知啦，一早話這是個one-waybet，不知又有何新意，除非話升30%-40%，咁又唔同！你估人民幣係咁升對香港好有益咩？不知為何又拿來作推高「港股」及國企升空之火箭？
哦！原來有報道指，國家信息中心和《上海證券報》聯手撰寫報告預測，指明年固定資產將放緩20%、出口放慢15%、消費則估計增長約12.5%，但整體經濟增長將放緩至9.5%，通脹就升至2%。不過近日屢創新高的A股，可望有20%至30%之升幅。
嘩！國家官方機構聯同金融報章教你炒股票喎，又點會死錯人？套在香港，國企指數升得嗰665點，濕濕碎啦！照乘，20%都仲有1300點升，如果30%，犀利囉！喂，唔到又點先？Sorry，阿拉講的是A股。但別焦急，有事中央又會送「大禮」，怕啥！炒!!