李嘉誠旗下間和黃集團，今年因閒置土地，無啦啦被國內相關部門罰款8000萬元，佢個乖仔澤楷又因為有意出售電盈畀海外財團，惹來中方不滿，更有傳聞話，事件影響咗中央同李嘉誠嘅親密關係，要同李氏保持距離。之不過，噚日中央電視台公布嘅2006年經濟年度人物，就頒咗嗰特別榮譽大獎畀李超人，呢個係經濟年度人物評選入面首次設立嘅特別獎，喺啲咁嘅時間，咁嘅環境，係咪暗示中央對超人嘅評價無外界講到咁差呢？
點解頒呢嗰獎畀超人？央視話，李嘉誠以超人嘅智慧創造咗龐大企業帝國，以個人財富創立基金會兼濟天下；今年，超人宣布將再捐出三分之一財富，總值480億元。
中央電視台經濟頻道總監郭振璽話，呢個獎項，係對超人喺今年善舉嘅一個敬意。佢又話：「這個獎項不是一個常設獎項，不是每年都一定有的，應該這樣說，如果有這樣的人物能夠擔當得起，夠資格獲得這樣的獎項，我們就會在當年度設。」
唔係捐得多錢就得
睇落真係以為捐得多錢就得，但據內地傳媒講，評選經濟人物嘅準則，除咗要喺自身行業有影響力之外，更重要係符合多數人嘅利益需求，即係關注社會公眾利益，回饋社會，對中國未來經濟發展具有一定示範作用嘅人。若果係咁，華華就真係希望佢哋每年都可以頒出呢個獎項，等多啲人受惠。
[email protected]