國壽（2628）公布A股招股價範圍，但並非市場早前預期的23至29元（人民幣．下同），而是18.16至18.88元，同H股上星期創新高嘅收市價24.35港元相比，折讓22%至25%，難怪有本地網友擔心國壽股價今日會受壓。
網友「獲利回吐」喺《公眾投資168綜合論壇》就發起：「國壽，大X事，有股災，仲係高度集中。」除咗MoNo認為A股好難保持每年升一倍，國壽亦難長升長有；其他意見似乎都幾正面。子醉金迷回應：「有關方面定價低啲……谷大倍數造勢，大陸有證券商都講咗抽200萬元以下A股唔會中嘅。」sdwin和議：「呢招叫拋磚引玉，開低啲人覺得有升值空間。」佢估國壽A股升到40元。
不過，喺《香港討論區》啲網友較睇淡，過半數（22人）都買跌，但認為22港元會有支持；有8人更睇18港元。