全世界嘅報紙老闆都知道互聯網興起，對報紙威脅甚大，淨係睇Google、雅虎兩大霸主嘅廣告收益，如果有一半回流返報業，梅鐸肯定會笑逐顏開。
報業不能坐以待斃，俾互聯網陰亁嘅，所以報業各有不同應對方法，例如自己開設新聞網站，以補不足，同時堅持新聞報道、時事評論嘅質素，靠「詳細分析」嚟吸引讀者。睇真啲，《金融時報》喺英國銷量增長一枝獨秀，眾報皆跌佢獨升，就係新策略成功嘅表表者。
另有一種，就係拚命搞年輕化，抄網上博客日誌，每日抄一輪。編輯、記者好易做，讀新聞系都多餘，識抄網就得啦，乜都搵甚麼網友評論，不分有何背景、目的，總之啱聽就抄。資深讀者如左丁山、惡佬明、賓架Ｙ等等睇到莫名奇妙。年輕化，淺薄化，「去知識化」，可能係報紙之最大敵人，因為愈係年輕嘅青少年，愈係唔睇報紙，只鍾意睇網。當報紙新聞變成抄Blog，中年人、老年人都被趕走，試問邊個會去買報紙？而報紙做新聞慳水慳力，大可炒一批記者慳番啲成本。
我哋當然亦會睇Blog、睇網，以補報紙不足，但唔係要在報紙睇Blog嘅撮要。惡佬明就經常留意建築界嘅八卦嘢，佢話呢行都有類似報界「小圈子」嘅網，內有好多不知真假嘅建築界是非，鍾意亂爆公司高層嘅所謂「衰嘢」。惡佬明話：「網友之言，好難講有冇可信性，你唔鍾意老闆昨日鬧過你偷懶，你就可以上網大罵老闆為人苛刻、孤寒利毒，一於唱衰佢。公司外人睇到，點分得出誰是誰非吖。」
網上傳播假消息，易過借火，甚至有人整蠱上市公司，以公司名義發假通告。網不可以不睇，但不可盲目跟隨。聖誕前賓架Ｌ嘅千金開咗一個私人Blog，Ｍ千金每日放工，去完蘭桂坊或蘇豪或皇九No.9之後，返屋企就寫Blog，賓架Ｌ急急與佢愛女約法二章：（一）不准提及賓架Ｌ及將父母照片上網，（二）不准講賓架Ｌ銀行之事。話雖如此，賓架Ｌ以後喺女兒面前恐怕都會口密啲。