中國球星姚明早幾日喺輸畀洛杉磯快艇場波，右膝受傷，估計至少要養傷6星期，對佢效力嘅侯斯頓火箭肯定係好大打擊；但原來姚明今次受創，仲影響到中國國內NBA賽事嘅電視收視率，同埋國內嘅籃球博彩注額㖭。
博彩注額同樣銳減
據播放NBA賽事嘅中央電視台有關人士推測，「明王朝」缺陣期間，收睇國內NBA賽事嘅觀眾肯定大幅減少（雖然𠵱家仲未有實質數字反映），因為火箭嘅賽事，係國內主力播放嘅NBA比賽，姚明唔喺陣，自然吸引力大跌。只要睇吓姚明自加盟NBA後，年年明星賽都做「票王」就知喇！
電視收視率下跌唔在講，冇咗姚明，竟然連國內球迷下注嘅心情都減退埋；因為據知國內籃球博彩佔咗半數都係下注火箭嘅比賽，注額大跌自然可以預料。
大有可能連明年2月嘅明星賽都參加唔到嘅姚明，或者都估唔到自己嘅影響力居然咁大，如果佢早知道，唔知會唔會「錫身」啲呢！