人稱小甜甜嘅華懋集團主席龔如心，早陣子登上報紙雜誌做頭版人物，全因與老爺爭奪老公遺產，兩爺媳數度對簿公堂。上個月，小甜甜終於放棄追討老爺6億堂費，令佢喺報界沉靜一段日子，點知噚日再次登上頭版，不過今次完全唔關爭產事，而係話佢身體出現毛病，懷疑患上英國女人病第四大殺手──卵巢癌。
消息一出，小甜甜揸重貨投資嘅股票股價登上跌幅榜前列，跌幅比起Boxingday嘅地震更厲害。
小甜甜有份持有嘅安寧控股（128）噚日進入跌幅十大，安寧登上第九位，跌咗足足12.9%；博富臨置業（225）就好少少，只係跌0.43%。兩隻小甜甜股，跌幅爭咁遠，因為小甜甜揸住安寧34.6%，而博富臨只係揸20.7%，所以插水幅度明顯有別。其實，散戶應該慶幸華懋冇上市，如果唔係，有消息傳出主席患重病，股價肯定直線插水。
咁啱得咁蹺，博富臨噚日召開股東周年大會，董事總經理黃達漳強調，同小甜甜冇私人聯絡，佢只係一個impressiveinvestor喎，仲要係睇報紙先知佢入咗醫院。
博富臨記招劃清界線
之前又有傳聞話，小甜甜會注資入去佢自己有股份嘅公司，黃達漳話，大家各自有獨立業務，注資手續又麻煩到死，相信小甜甜唔會對博富臨注資或者注入旗下物業喎。
唉！香港地人情真係紙咁薄，華華仲以為佢會追問吓小甜甜病情，話晒都係主要股東之一吖，估唔到佢即刻劃清界線，連番強調大家只係生意夥伴，唔通商界真係咁冇人情味？
[email protected]