新一代遊戲機，除咗講聲畫靚之外，原來仲可以有另類用途，就係可以同家人增進感情！以前打機總係一個人打，所以好多家長都反對小朋友打機，話會搞到自閉喎，但最近網上討論區就有人講，自從買咗Wii之後，連父母都變埋機迷，一齊打機，你話幾開心！
「自從阿媽玩過一次之後，就問我自己點開機玩、按咩掣，仲俾佢話我唔預佢一齊玩，激死！」類似文章都見到唔少，睇嚟Wii真係吸引唔少平常無打開機的人都玩埋一份。
「第一場保齡球，輸咗畀阿媽！」
最搞笑有人話：「阿媽日日都自己偷偷開機玩，仲要扮無事發生，其實我都知道，因為Wii內係可以睇番遊戲記錄㗎！」
仲有爸爸上來留言：「買Wii都係想同仔女一齊玩！」
呢啲網上討論，不約而同有個共通點，就係一家大細齊齊玩《WiiSports》內的保齡球遊戲！可能因為呢個遊戲唔使咁大運動量，老人家都啱玩。其實我就推介個網球喇，因為兩人對打，又叫又笑，比輪住打保齡球緊張得多。
記者：許福合
http://www.uwants.com/viewthread.php?tid=3125351&extra=page%3D1&page=1