身家同官非真係有微妙嘅正比關係。電器大王黃光裕04年登上《胡潤中國富豪榜》寶座後，官非就開始纏身。估唔到𠵱家中國富豪連榜都未上，就俾政府起底，天發集團主席兼全國工商聯石油商會會長龔家龍就係未上榜先中招嘅一位。
據內地報章《新京報》話，冬至前夕，龔家龍被帶返公安廳問話，佢唔單止涉嫌虧空政府撥款10億，仲走銀行數，欠落中行、建行同農行等9家銀行29億元人民幣貸款未還。龔家龍短短十多年，透過上市融資兼併就擁有天頤科技同天發石油兩間內地上市公司，高峯期總資產值超過60億，絕對有能力喺富豪榜佔一席位。
29億絕非小數目，足以買到灰姑娘徐子淇嘅結婚禮物──山頂倚巒5000呎大屋16間有餘。一位中招主席就為銀行帶來高達29億壞賬，如果一年多幾個呢啲主席，銀行壞賬數目肯定比股價升得更急更快，到時銀行真係多得呢班米飯班主唔少喇。