香港近日刮起懷舊熱潮，繼天星碼頭鐘樓後，熱風仲蔓延到皇后碼頭等其他古舊建築物；不過喺追求咁高層次嘅懷舊回憶之餘，另一邊廂，香港失業重災區嗰班地盤建築工人，見到政府大型項目被唔同意見一拖再拖，而工人嘅最基本層次──保住個飯碗嘅要求──就冇乜人理。
上星期英皇國際開記者會介紹業績，董事總經理范敏嫦講起呢個熱門話題，提咗個幾有創意嘅解決方法，話可以滿足各方需求。佢建議政府撥地興建一個香港懷舊園，將嗰啲有懷舊價值嘅建築物遷入園內，配埋歷史背景解說。
佢仲主動請纓，話英皇可以為懷舊園包裝，加添娛樂設施，咁唔單止滿足港人對懷舊嘅情意結，仲可以為香港增加多一個新景點，畀遊客觀賞同了解本土歷史，香港又可以繼續發展，可謂一舉多得！