聖誕節普天同慶，一眾進攻球員近日紛紛打破入球荒，可以開開心心過聖誕喇！最開心係破近9個月入球荒嘅國際米蘭前鋒阿祖安奴，因為同時協助球隊平咗11場連勝紀錄。
「阿祖」對阿特蘭大場波先任後備，點知列高巴開賽8分鐘受傷離場，結果在伊巴謙莫域停賽、告魯斯受傷缺陣之下，「阿祖」先獲得後備上陣。下半場，佢接應費高傳中頂入1:1，自3月29日歐冠盃8強對維拉利爾後首次入波，真係等到頸都長呀！
國米最後勝出2:1，並平羅馬上季創出嘅11場意甲聯連勝紀錄。會長莫拉堤之後好興奮祝願大家聖誕快樂，「阿祖」亦狂擦老細鞋，話自己幼年喪父，莫拉堤一路畀好多有用嘅意見，仲話自己希望想盡辦法，令對方開心㖭！
「阿祖」同時多謝隊友同球迷支持，我求大俠覺得「阿祖」漏咗多謝教練文仙尼。因為呢位巴西前鋒因參加派對缺席上周一訓練，文仙尼冇發火仲對外隱瞞話獲得佢批准，今仗對阿特蘭大先做後備就當作小小懲罰喇！
施斯洛賓AJ齊「士哥」
除「阿祖」外，馬賽前鋒施斯亦自從今夏加盟後首次入波，上周五助球隊2:1擊敗聖伊天。呢位法國國腳自從世界盃前重傷後，直至本月10日首次後備上陣對摩納哥，希望呢個入波可為佢嚟緊呢年可以順風順水啲喇！
前晚，愛華頓前鋒安祖莊臣（AJ）亦自9月底以來首次入波，協助球隊2:0擊敗雷丁；車路士前鋒洛賓對韋根個致勝球更不得了，係自今年2月25日以來，為車仔射入嘅第1個波，真係難得喇！
「聖誕節乜嘢禮物最可貴？梗係自己一手炮製嘅禮物喇！黑色06年已成過去，希望「阿祖」、施斯等人出年入球停不了。」