【澳門直擊】林子祥（阿Lam）前晚喺澳門漁人碼頭舉行一連兩場演唱會，班觀眾一早入場，點知等咗成半粒鐘先開騷，難免有少少鼓譟。跑慣江湖嘅阿Lam自然識做，一出場即刻大派禮物，演唱歌曲《選擇》時，仲落台搵咗個嚟自香港嘅女fans合唱。只見阿Lam含情脈脈咁望住女方，又搭住佢膊頭，唱完之後，嗰位女歌迷仲主動向阿Lam獻吻，難怪阿Lam大讚：「佢唱到差啲好過沙麗（葉蒨文）！」
「升架都有啲震」
之後阿Lam由慢歌唱到快歌，最後仲熱到要除衫，又同兩名打扮成俏護士嘅舞蹈員跳辣身舞。雖然阿Lam試過喺汪明荃嘅演唱會上跌落舞台機關，右耳受傷，不過前晚佢成功克服陰影，唱《在水中央》嗰陣企上離地10幾呎高嘅升降台。事後阿Lam話：「其實個升架都有啲震，好彩有四條柱支撐，又唔算升好高。」佢仲話右耳聽覺只得五成，開騷時要戴耳塞。
問佢老婆沙麗點解唔嚟捧場，阿Lam話：「我喺美國間大古堡賣咗，換咗間細古堡，佢喺個邊搞裝修。兩星期後會返嚟。」
