理工大學如果喺附近一塊空地起一幢新教學樓應付轉四年制，大家估吓有乜嚴重後果？答案係會加劇維港空氣變差！八方唔係靠嚇，而係根據理大附近豪宅衞理苑反對理大建新大樓嘅文件所寫，原因係話新大樓高11層，阻擋自然風，令空氣污染物積聚，所以叫理大改去港島、九龍東或新界建新大樓。
呢個屋苑嘅住戶近日去信油尖旺區議會，反對理大提出喺漆咸道南與公主道交界嘅一塊空地興建新大樓，原因有好幾個，例如交通流量增加會阻礙伊利沙伯醫院救護車輛，又話理大雖然距離衞理苑200幾米，不過理大𠵱家夜晚已嘈到佢哋，再喺屋苑附近建新大樓，噪音會更大。佢哋仲好坦白，話到明新大樓會影響景觀，尤其係最近新大樓嘅D座住戶，令日照時間大大縮減，「剝奪可享有之太陽光照射的本有權利。」