連接鑽石山志蓮淨苑嘅南蓮園池開咗個幾月，呢幾日假期有唔少市民去參觀。八方早排講過，管理單位覺得部份參觀者唔守秩序又冇公德，搞到管方冇晒符。不過，亦有啲市民認為管得太嚴，園內好多地方都貼住個「止」字，唔畀入，有個市民仲建議，不如個園改名做「止園」仲貼切。
有個讀者又話，早排佢幫朋友影相，拎咗部pro啲嘅鏡頭入去，唔知園方係咪擔心佢影相作商業用途，結果俾人跟足全程昅到實，對方仲好似務求要破壞張相咁係要攝入鏡頭範圍。後來幾個實Q出嚟圍住佢哋，要佢哋離開，雙方嘈咗一輪，呢位市民惟有冇癮離去。
八方有個friend亦有親身經歷，佢早兩日去南蓮園池，扮晒風雅咁想入間茶館品茶，點知路口位女義工一手攔住佢，話「唔好意思，呢度唔畀入去參觀嘅。」八方個friend話：「我想入去飲茶喎。」女義工有少少𤓓咗咁話：「咁你有冇睇過個牌。」即係旁邊個價目表，每盞茶最低消費都要百幾銀。八方個friend有啲㷫，答番佢：「你咁嘅態度，我𠵱家唔飲喇。」轉身走嘅時候，仲聽到女義工講「咁你又唔一早講（入去飲茶）。」
歸根究柢，園方咁神經質，都係因為部份香港人唔生性，好唔文明咁亂摸亂行，好易破壞園內珍貴嘅花木山水古石，但咁唔信任所有入園參觀嘅市民，又確實令人好冇癮。係咪有方法平衡吓呢？
