今日係聖誕節，本應係普世歡騰嘅開心日子，但對於兩鐵員工嚟講就未必會係咁，特別係今年曾經支持九鐵前行政總裁黎文熹逼宮嘅九鐵多位高層員工，就更加擔心會唔會被上頭乘機以合併為由，請食無情雞。
噚日九鐵主席田北辰出席九鐵聖誕派對，自然被問起呢單嘢。田二少就話，兩鐵董事局喺合併事件上係實事求是，佢曾經向董事會表達過呢件事嘅意見，佢認為今次只係個別事件，相信唔應該影響員工嘅表現，佢仲話唔應該抹煞員工多年嚟嘅貢獻。如果咁講，呢幾個高層出年仲有機會參加兩鐵合併之後鐵路公司嘅聖誕聯歡，但唔知田二少出年呢個時間仲有冇得參加鐵路公司呢個派對呢？