今個聖誕大家唔使再捱又亁又嚡嘅火雞喇！因為近年威盡中國，開業幾年就被評為上海10大小吃，連菲律賓、馬來西亞同溫哥華都跟住佢打老邊嘅「重慶雞公煲」已登陸香港！大家以為過江龍？錯晒！「幕後黑手」竟然係香港人！點解開咗150間分店先嚟香港？「冇諗過會咁受歡迎，𠵱家國內市場成熟，咪益番自己香港人囉！」
記者：朱崇德
攝影：陳陶鈞
重慶試菜攞靈感
重慶雞公煲有幾熱爆？02年中國沙士期間開業、再經歷04年禽流感，種種不利環境下照熱賣，北京、上海、福建……連海外分店共有150間！更被上海人評為「上海10大名小吃」！同行政總廚Jeffrey及GMLeo傾偈，問佢點解咁把炮攞到個香港代理？「我哋先係始創人！一次去重慶巷仔試菜，有個『亁燒雞煲』排晒長龍，味道辣辣哋好食到不得了，但食完個煲啲雞汁剩番晒好嘥，所以諗到先食煲，再用個濃汁加湯打邊爐嘅新概念！」
100種中西香料做醬汁
記者認識2人，始於銅鑼灣的InSideOut，佢哋都笑自己是西廚學做中菜！「做開西廚，餐廳衞生特別好；不過更重要係打破傳統一大班人圍爐而食嘅習慣，改行1人1鍋，衞生好多！過到沙士、禽流感呢關，都係靠佢」。據知雞公煲最獨特之處係個醬汁：「我哋以超過100種中、西香料混製而成，有丁香、大小茴、花椒、八角。」中式賣相再加Fusion式醬汁，是破格的打邊爐方法，可能這是出奇至勝的原因。
重慶雞公煲$78
明明打邊爐，點解半隻雞連煲上？侍應話：「唔使心急，食完隻雞先再用個汁打邊爐！」明晒！雞特別選用走地雞，而且只用1.2斤重，入口唔肥仲好有雞味；聰明處係雞件完全爆至亁身，個獨特醬汁愈煲愈入味，口感是香香辣辣，但辣而不麻，同大家食開嘅啫啫雞煲好唔同！
食法攻略
牛魔王$78
呢個係勁受國內歡迎的菜式，Jeffrey話：「國內牛丸係粉多過肉，我哋用上等牛筋丸，再加鮮牛坑腩，湯底是微辣的牛肉濃汁，配蘿蔔、亁葱頭、洋葱等，好鬼西菜Feel，我最愛都係個坑腩，非常有咬口，因為西廚整肉唔會用鬆肉粉，所以食得健康又原味！」
香辣蝦$88
呢款係香港店獨有菜式，其他分店冇得食；簡單講係將西菜嘅爆穀蝦（將中蝦炸至開花，勁脆口！）加薯條做打邊爐；醬汁底是花椒加辣椒，但入口甜甜哋，甜住嚟辣非常破格，留意薯條會吸收麻辣醬汁同蝦嘅鮮味，愈留後食會愈入味。
四川雞飯$42
呢隻四川雞是以海南雞方法做底，再加豉油汁上色；入口有海南雞的滑口，但又勁入味！雞隻選用最香口的黃油雞，雞油會切出嚟榨油，再加香料浸成香油；再以此香油搽煲底煮飯，所以由雞面食到飯底都有濃郁雞味，飯食入口微焦，好香口！
睇路搵食
重慶雞公煲（25281060）
地址：灣仔聖佛蘭士街4號至6號地下A店
座位：40個
營業時間：11am-11pm
