鄔醫生過身之後,據知北京都諗緊究竟搵邊個代佢做基本法委員會成員好。講接任條件,梗係做過基本法草委嘅最好不過,但係老董未腳痛敗走前定落咗項不成文規定,希望基委會成員唔好係行政或立法會議員,而煲呔又唔想改咗呢項條件,所以最有資格接任嘅譚耀宗,應該冇行喇。
近期吹得最熱嘅,就係啱啱喺哈佛讀完書,轉咗去清華大學做高級訪問學者嘅邵善波。有政界中人話,邵老唔係冇可能,但同時唔好忽視另一隻黑馬,就係前港進聯主席劉漢銓。
劉律師係港事顧問,又做過香港特別行政區籌備委員會委員,同中方關係幾好,加上佢都有個律師牌,即係識啲法律咁啦,中央都幾睇好佢,所以話佢做呢個位都唔係冇可能㗎。𠵱家最大問題係,劉律師得唔得到煲呔、立法會主席范太以及終審法院首席法官李國能歡心,肯聯合提名佢接呢個位呢?