咪以為呢個世界只有高達係受歡迎嘅機械人，查實響近十幾年來遊戲界都有兩款令人津津樂道嘅機械人對戰勁作，分別係《VirtualOn》同《ArmoredCore》兩大系列，《AC》畫面靚，論操控、論模擬揸機械人嘅真正感受，《AC》絕對稱得上係同行一哥，揸熟咗就會覺得高達嗰啲真係流到痹，完全唔掂當。如今承PS3發售，推出咗全新一集《ArmoredCore4》，唔單只畫面正到飛起，更支援網上對戰，等各位皇牌機師可以隨時同㗎仔過招，實行來個港日大激戰！
文：陳福榮
畫面震撼
話晒都係PS3人氣大作，光影效果肯定令大家有驚喜!過往做得已經算好好嘅招式同場景，今次仍然保持喺水準之上，當使出強勁激光炮或掟幾百粒飛彈出嚟，嗰種震撼感真係突顯晒呢部新機嘅處理性能優勢。
冇咗全高清
「夕陽無限好，想睇唔該請早！」即使《AC4》畫面咁正，但臨推出前先取消1080p，唔通真係畫面效果太複雜，驚谷到上FullHD就出事？
今集畫面配置比以前細緻好多，唔單只見晒成部機個背脊，其他數據資料都Set得非常清楚，仲有幾多血同彈藥剩低一目了然。
點解咁多人話《AC》難玩？無他嘅，唔單只操作麻鬼煩難上手，最大鑊嘅係根本就冇AutoLock功能！
偷格要鬧
遊戲程式好似未臻100%完善，一來當畫面要同時顯示大量物件、特效同機體時，佢會突然間DropFramerate得好勁（俗稱偷格），唔知呢個係咪同佢預你上網連線玩有關，抑或真係PS3現時嘅極限？
決戰㗎仔
要講明PS3係免費提供對戰平台畀大家，據玩家意見，響日本出咗無耐已經有唔少老手打躉，港機迷想搵㗎仔挑機真係話都冇咁易。
《AC》嘅操控一大特色，就係時速超越1,000km/h嘅無限噴射推進（OB），今次佢成為咗所有機械人嘅標準裝備，唔單只可以作長時間噴射推進，而且能量亦變成無限，換言之極速戰鬥變到勁快，令人時刻熱血沸騰。
Secret！要贏先睇裝備
一睇見呢個畫面，唔知碇可能誤會佢係《前線任務》呢！事實上《AC4》秉承咗過往「優良傳統」，好重視成架機每個環節嘅設定細節，唔單只同你計到盡每個Parts裝上身到底有冇用，你係「近身搏鬥型」定係「狙擊兵」陰濕打法都好唔同啦，仲有部機加埋有幾重及消耗幾多油，亦有條數計畀你睇，全部都會左右大局。
PROFILE
機種：PS3
廠商：FromSoftware
類型：ACT
人數：1-2人
（連線最多8人）
價錢：$428
同場加映：歷代作品一次儲齊
為慶祝《AC》系列推出咁多年，兼且紀念廠方成立20周年，今次推出包含過往四集正章作品嘅懷念特別版，由初代PS嘅《AC》到PS2之前嗰隻《ACLastRaven》都有。佢仲包埋特別影像DVD、重新編輯嘅OST、印有大量精美機體嘅畫冊以及設計圖特大海報，由於數量有限每套設有獨特編號，就算唔用嚟炒都有珍貴收藏價值。
