立法會議員最鍾意喺聖誕雞飛狗走去旅行，被視為親政府政黨嘅民建聯，唔少大佬鍾意返內地睇國情，劉江華會去雲南麗江、譚耀宗會去珠三角走走（但死都唔肯講去邊），主席馬力呢？梗係坐鎮中央權力核心──北京。點解聖誕要去北京？都係因為要列席人大常委會啫，會期仲要由噚日開始，29號至完，陪同馬力喺北京過聖誕嘅仲有另外五名港區人大楊耀忠、簡福飴、梁秉中、王如登同馬逢國。
雖然北京嘅聖誕始終冇香港咁熱鬧，但唔少北京市民愈嚟愈重視呢個節目，好多地方仲推出聖誕自助餐。住喺北京飯店嘅馬力一提起聖誕自助餐就好鬼勞氣，點解？之唔係價錢超揦脷，完全唔啱普通人去食囉。
馬力話香港貴價酒店嘅聖誕自助餐，有時可能要成三幾千銀，但北飯都唔弱，竟然要成二千幾銀，真係未食望到價錢牌都覺得飽。馬力話北京市人民消費能力仲未好高，唔明北飯整個咁貴嘅自助餐做乜，就算係佢自己都食唔起，何況啲市民？真係離晒大譜。睇怕北飯都係要減價先至有誠意喎。
除咗馬力，煲呔26至29號都會上京述職。馬力話大家冇約，又住喺唔同地方，冇乜碰頭機會；假如有機會都可能只係街上偶遇喎。如果煲呔請馬力去北飯食自助餐，佢又唔知會唔會應約呢？
梁家傑街頭報佳音
煲呔述職前會休息幾日，勁敵梁家傑就唔得喇。人選特首，佢選特首？梁大狀選到要日日喺街頭叫爆咪，煲呔就可以懶懶閒咁歎，之唔係有中央撐同冇人撐嘅分別囉。
噚日係平安夜，梁大狀冇偷懶，同埋成班公民黨黨員喺街頭唱歌報佳音，黨友陳淑莊仲專程喺開咪之前，拉咗梁大狀練歌一粒鐘，做嘢真係一絲不苟，難怪大合唱《平安夜》同《JingleBell》等應節歌時都好多市民拍掌。
梁大狀屋企人一向支持佢選特首，而且仲身體力行，噚日梁太Carol唔單止同囡囡到場，而且仲叫埋孖生姊妹Rita出席，實行一家人齊心大合唱，再加上余若薇同李志喜鼎力支持，唔怪得歌聲咁和諧。梁大狀話，最希望煲呔做個聖誕老人，述職之後帶多啲好消息畀香港人就真係普天同慶喇。