到滙豐銀行四十一樓食飯，發覺樓下搭𨋢入口處寬闊咗好多，令人客與職員唔使逼埋一齊，舒服好多。食完飯之後，主人家總監V介紹銀行入口長廊之中間，裝置咗一塊「影視牆」（videowall），由幾十件plasma合組而成。有影視牆，自然要有圖片播送先至得。滙豐認真識得捕捉潮流，影視牆不斷播送香港古老圖片，左丁山睇咗兩三分鐘，見到嘅係一九○○年皇后大道中、德輔道中（當時海皮）嘅建築物舊?。𠵱家潮流興講集體回憶，保護文物，講求heritage。咦，百分之一百嘅香港人，都唔會見過一九○○年之德輔道中建築群，只會偶然在香港老照片集中睇到一啲圖片，回憶十分有限。走嚟滙豐總行睇吓video，可以望梅止渴。中環兩條大路，大馬路與電車路嘅真正古老建築物只剩番立法院大樓一座，相信永遠唔會拆，作為香港鬧市唯一之「史前」回憶。
一百年來，中區填海地帶不斷擴充，由德輔道一路擴展至現在國金二期，假如一百年前有一位港督會同行政局，下令以後永遠唔准在中環填海，你估戰後香港之經濟發展會係點樣呢？中環會唔會咁興旺？木宰羊。百幾年來，唯一屹立不倒，愈嚟愈壯大，甚至有資格問鼎世界霸主嘅機構，就係滙豐，呢間銀行老而彌堅，與時俱進，雖係英國銀行，其實全靠香港呢塊寶地先至得到發展，時至今日，與香港關係仍然十分微妙。唔似得怡和集團咁，一百年前對香港影響力大到極，進入二十一世紀，我地行入置地廣場，幾乎唔記得咗係怡和嘅！
拜拜滙豐之後，收到靚女公關T電話，佢喺「時代廣場」買聖誕禮物，入面旺到人逼人，街上則車塞車，欲逃離銅鑼灣，非搭地鐵不可。但由時代廣場一路行去地鐵站，行到腳軟先至到。呢間「時代廣場」真係化腐朽為神奇，由十分污糟嘅電車廠化身為一級商場，好似塊磁石咁吸引遊人。當年包玉剛敵意收購九倉，作價只不過係百零億，怡和已經出售控制權咯，相信淨係「時代廣場」，已經值百幾億啦。其他海洋中心，連卡佛，會德豐等等，係怡和送嘅。