特首曾蔭權伉儷有個共通點，就係對事物對信念嘅堅持，冇人可以改變到佢哋。正如曾蔭權堅持要拆毀天星鐘樓咁，曾太鮑笑薇女士都好堅持一樣嘢：冬天要着皮草。八方上星期提過，呢位特首夫人着住件fur去睇《帝女花》，引來動物組織抗議，原來佢着皮草唔係第一次，睇來亦都唔會係最後一次。
身為香港愛護動物協會贊助人嘅曾太，真係好鍾意動物……身上嘅皮毛。早喺上年12月嘅女童軍90周年晚會，佢已經一手拎住件白雪雪嘅皮草披肩，艷壓全場。今年10月，香港愛貓救世軍已經去信畀特首伉儷，重提當晚嘅事，提醒曾太唔好再着皮草。但係特首夫人依然故我，喺今年12月再度披fur出擊，睬你都儍。
八方理解唔到曾太嘅理念，只係心生疑竇：食狗肉要坐監，咁着皮草呢？