我，韋定邦，警隊督察，最近黑幫勢力在新界區擴展，上頭落咗Order壓一壓黑幫氣燄，我頭炮就要打新界大老虎「仁義社」，行動代號「卧虎」。龍頭「老爺」有唔少助手打江山，包括雞精、鏹水、Tommy仔等警方派出上千卧底埋伏，收料收風，不過，套戲埋尾，我一直唔知邊個係真正卧底，直至睇到DVD版嘅Bonus，原來係佢……邊個?你睇DVD嘅Bonus咪知囉。
記者：許福合
上頭之所以交呢個行動畀我，全因為我有7年卧底經驗，熟悉黑幫運作，今次安排卧底因為要生面口，全部由警隊各部門挑選，身家清白，再由我親手訓練，個個行出嚟都似足蠱惑仔。
卧底夥計終於被刀仔當街殺咗，無咗重要證人，告唔入佢哋。
第一次有夥計出事，我好難過，覺得應該改變策略，主動出擊。
表面上，我暫時無法拉到佢哋，不過卧底探員開始進佔有利位置，幾位大佬就唔可以坐得咁安樂。
另一方面，仁義社大佬鏹水開始有行動，啱晒。鏹水主要從事放數，但估唔到佢有個好有音樂天份嘅仔，有望成為明日音樂家。
經過多次掃蕩，仁義社唔少堂口都被迫收檔，不過當中有意外收穫，事緣有個馬仔被社團以為係卧底，更塞佢食丸仔，再掟佢出馬路，我派人救咗佢，收到唔少情報。
鏹水因為係Tommy仔屬合夥人關係，被警方申請鎖晒佢銀行賬戶，無錢使，自然火都嚟！
出咗咁多事，龍頭終於出嚟主持大局，不記名投票，以負責任為名，其實想睇手下意向，點知發現大家對雞精相當支持，有蓋過佢之勢，於是露出殺機。
雞精一生人第一次求人，亦係最後一個要求，就係請刀手唔好響女朋友面前殺佢！雞精死咗，仁義社同其他大佬下場又係點？買今個星期出嘅《臥虎》DVD睇吓啦。
5大必睇位
12點後我話事
一開始警察喺街邊查幾個紋身漢，估唔到被人大番轉頭，仲話「12點之後，呢度我哋話事！」警察都無符！
牛肉刀出手
刀手貴為幫會殺手，不過佢嘅武器唔係咩神兵，而係一把生銹牛肉刀，但佢出手的確狠而辣，朋友都無情講。
老兵晒馬
當幫會晒馬唔夠人時，可以點算？搵啲阿叔阿伯砌夠人頭咁都得呀？
我最鍾意斬人
劇中陳小春就好似司令官一樣，安排社團刀手，而茶餐廳夥計波記經常話預埋佢，仲話：「我最鍾意斬人。」
唯一愛情
曾志偉同郭羨妮幾幕係劇中唯一愛情元素，但最令人意想不到，原來……唔講住，記得睇Bonus。
Bonus必睇：誰是關鍵卧底？
今次《臥虎》係雙碟版DVD，Bonus獨立一隻DVD，內容自然特別豐富，除咗有演員、導演訪問外，更有電影相集、Trailor等等，不過必睇梗係刪剪片段一節，通常內容都係一啲唔重要片段，不過睇完正場電影之後，你可能會覺得郭羨妮呢個角色真係大花瓶，可有可無，只係襯托出雞精呢個角色更有人性，但睇過刪剪片段後，會發現郭羨妮其實係一個伏線，可惜唔知咩原因，戲院上映時呢段被刪去，令到觀眾要睇埋Bonus，先有完整睇完嘅感覺。
DVDPro(23326326)