衛蘭（Janice）和衛詩（Jill）日前相約抽空歎聖誕大餐，面對眼前美食，兩姊妹將keepfit念頭拋諸腦後。她們表示聖誕節原本是最喜歡的節日，不過加入樂壇後，連聖誕都要開工搵銀，故特別懷念兒時和母親在韓國滑雪浸溫泉度聖誕的情景。
臨近年尾，樂壇孖妹衛蘭和衛詩除了忙於為各頒獎禮準備之外，今個聖誕節也要工作搵銀。雖然兩人異口同聲表示最喜歡的節日就是聖誕節，可是自從加入樂壇後，連朋友都很少聯絡，所以只好相約公司同事慶祝，她們笑說：「我哋冇晒朋友，因為佢哋都怕咗，驚同我哋出街會俾人影，所以都係諗住同公司同事開party玩吓咋。」
與母過節最溫暖
雖然兩人在今個聖誕節未能盡情享樂，不過為了率先感受節日氣氛，日前便抽空到尖沙嘴GatewayHotel內的LaBrasserie餐廳大歎聖誕大餐，Janice和Jill面對美食，連keepfit計劃也拋諸腦後，她們品嚐過火雞、沙律等美食後大讚頂瓜瓜，大擦一輪後，孖妹又不忘為《蘋果日報》讀者寫上心意聖誕卡，希望大家可以度過一個開心難忘的聖誕節。
談到難忘的聖誕節，兩人表示兒時在韓國和母親一起度過的聖誕節印象最深刻，Janice說：「嗰時我哋有滑雪同浸溫泉，真係好開心，始終節日要同家人一齊過先夠溫暖。」Jill則說：「我同家姐都好鍾意雪，而且過一個白色聖誕先似過聖誕，聖誕節唔一定要同男友過先浪漫，要浪漫就大把機會啦，仲有情人節嘛。」她們表示由於叔叔是聖誕當天生日，所以會在家中搞聖誕生日派對，Jill說：「連續好多年都係咁過聖誕節，成班親戚聚埋一齊好熱鬧，不過到我哋成長之後，好少再咁樣過，而且我哋聖誕節都要出去唱歌搵錢，所以有時都好懷念細個時無憂無慮嘅生活。」
採訪：駱華齡 攝影：陳志嵐
場地提供：LaBrasserie,GatewayHotel
化妝：江中平ofA&VMakeupSchool
髮型：BluedyWongofHairCulture
服裝提供：LaneCrawford
