「爹哋！今日平安夜，去邊度玩呀？」經阿仔阿女一問，我同老婆就頭都痛。聖誕節就梗係想食聖誕大餐、收聖誕禮物、遊聖誕主題樂園……但一家四口咁玩法，一日使費就要幾千蚊，荷包大大不平安！好在，各大商場為迎接平安夜都準備了好多啱一家大細的主題玩意，包括廸士尼公主、雪人及企鵝。其中「廸士尼公主加冕盛典」更恍如置身主題樂園，𠱁囝囝囡囡等於去了廸士尼，最重要係摸摸褲袋，咦？荷包忽然多咗千二蚊！
記者︰謝偉文
攝影︰陳盛臣
模特兒︰Kenny、Michelle、Sammi&Ian小朋友
德福媲美主題樂園 廸士尼公主加冕
沒有米奇米妮、沒有小鎮大街飄雪飛舞，但卻有白雪公主、睡公主及灰姑娘駕臨德福廣場二期進行加冕儀式，老婆同囡囡一樣不能自控，一早去霸頭位準備影靚相。見佢兩個灰姑娘上身，霎時儀態萬千，連阿仔都認唔到媽咪！廣場一期更有三個主題場景，「仙履奇緣仙蒂與南瓜車」、「白雪與七個小矮人」及「小美人魚艾莉奧」，阿仔同我都昅到眼定定。最矚目的是灰姑娘架南瓜車，大大架放在行人道上，車身用小燈裝飾閃閃生輝，超多人搶着上前影相。除1:1公主像，特定時段還有真人扮演的公主進行加冕儀式。阿女同媽咪過公主癮過得開心，我荷包慳番一家四口入廸士尼千二銀入場費就仲興奮！阿女仲醒，入場即拎本公主手冊去每個場景蓋公主印章，話集齊六位公主印章就可得神秘禮物，不過想要「睡公主」、「美女與野獸」及「茉莉公主與阿拉丁」的印章就要去埋杏花新城。點解唔集齊在一個商場呀？走咁多地方，但阿女鍾意就冇計啦！
日期︰今日（12:00nn、2:00pm、4:00pm及6:00pm，每節加冕約45分鐘）
地點︰九龍灣德福廣場二期三樓中庭
參加辦法︰於德福廣場消費滿$200（發票必須為電腦單據）即可換領入場券一張，每張入場券可供4人入場。入場券換領時間為每節表演前一小時（即11:00am開始），名額有限，先到先得，換完即止。
查詢：27500877
去玩去癲嚟青衣城 30呎超級大雪人
想過白色平安夜？唔使特意去海洋公園，去青衣城都得。當然大雪場就欠奉，但有雪人製作坊，小朋友可用真雪砌雪人，不過記住戴手套，唔係就好似阿仔咁玩到雙手紅卜卜！若心痛小朋友手仔痛，可以等下一節時間，雪場會變成朱古力工房，仲有專人教做雪人朱古力。青衣城這個雪人村布置好warm，有用木做小橋，旁有摩天輪、滑雪梯、聖誕雪橇，好有芬蘭感。正中間仲有個全港最高30呎超級大雪人，肚腩位仲有個大螢幕，播映著名影像作家伍尚豪為商場創作的雪人動畫。
日期︰即日至12月26日、30-31日及2007年1月1日
地點︰青衣城一樓夢幻島大堂
參加辦法︰捐$50予樂施會，並在青衣城消費滿$100或以上
真雪雪人製作坊
今日5:00pm-6:00pm（每節6人，約8分鐘）
雪人朱古力工房
今日6:30pm-7:30pm（每節6人，約8分鐘）
查詢︰21867284
西寶城開派對 親親大熱企鵝
今年聖誕企鵝大晒，除了大銀幕被牠侵佔，連商場都無可倖免。甫到西寶城，發現Pingu隨處可見，上至天花板，下至柱樑，場中間更有巨型吹氣Pingu彈床，阿女着晒魔唔肯走。除此，西寶城都以真雪作招徠，雖未至於可以玩雪戰，但砌雪人就唔使錢。阿爸同阿仔玩雪之餘，老婆阿女仲可以去另一邊小廚室跟老師學整曲奇餅。場的另一邊又有玩具室，小朋友可以玩泥膠、畫畫，每日更送出20隻免費扭蛋，先到先得。
除西寶城，新元朗中心有星級踢躂小企鵝陪你。一班小朋友穿扮成企鵝模樣為大家表演舞蹈。可愛企鵝布置啱晒影靚相。
日期︰即日至2007年1月1日（1:00pm-6:00pm）
地點︰西環西寶城地下高層中央廣場
查詢：63854845