做藝人，等於食四方飯，有乜不滿都要嗗一聲吞咗佢！正如已被人遺忘99年港姐大熱身份嘅梁敏儀（Winnie），在網上最有人氣嘅搜尋，並非亞視威過一輪嘅《情陷夜中環》，反而係《鬼眼刑警》入面「被鬼硬來」一幕，伊人並沒耿耿於懷：「最緊要有人記得啫！做人但求開心同平安，最好以後每年嘅平安夜都無風無浪，平平安安！」
文：吳心彥
攝影：何家亮
電影《鬼眼刑警》一幕「被鬼姦」令人難忘，而亞視劇集《情陷夜中環》中，更憑34B上圍跟麥家琪、葉璇、李思蓓同場較量。
新牌仔夠膽買新車
翻查資料，原來今年已是Winnie度過第30個平安夜，雖然伊人表示剛回復單身，未有Honey陪伴度過，不過全家人慶祝補數，「親情始終放喺首位，今年聖誕最開心係重拾小時候，同屋企人、親戚一大班人浩浩蕩蕩，揸車去大擦聖誕餐！」
拍攝當日天朗氣清，筆者和攝影師坐上Winnie架ToyotabB後，眼見佢揸車手勢自然流暢，信心十足，仲以為經驗豐富，「我只係考咗牌5年，當初一考到就決定買新車，屋企人同朋友即時反對，話新手揸車好易有意外，但係我無理，最後分期供咗架約十萬嘅標致206。」
坐過吳君如車即上癮
「可惜新車落地唔夠一個月就受傷，向後泊位唔小心撞花咗車尾，好肉痛呀，當時諗早知買二手車無咁傷啦！」
原本諗住唔會再買車的Winnie，因一次偶遇，令她再牽起買車的慾望，「01年同君如、鎮宇拍ATV遊戲節目，碰巧話揸車出去食飯，我坐住君如㗎車，覺得好舒服好闊落，後來先知原來叫做ToyotabB。」1年前Winnie將病入膏肓嘅標致TradeIn，賣咗3萬，自己再補貼7萬買咗呢架黑色ToyotabB。
對於ToyotabB的評價，Winnie絕對有讚無彈，「你可能會覺得外形唔吸引，不過當你一坐落就會覺得好舒服、好穩陣同安全，我又唔係講求速度嘅人，1,500c.c.已經好夠力，揸起嚟比舊嗰架仲好揸，而且睇位仲易過以前㖭。」
話你知：ToyotabB力Sell方匣子
在2000年登場的ToyotabB，賣點全賴其方匣子造型，不少年輕車迷也因此愛上它，更加裝不少HipHop配件！不過一直只有水貨到港，而機械配搭則由最初只有1.3公升型號，加入配用1.5公升直4引擎版本，可是剛推出的新一代變得圓潤，稍欠吸引力。
ToyotabB1.5Spec.
引擎：1,496c.c.直4DOHC
馬力：109ps/6,000rpm
扭力：14.4kgm/4,200rpm
傳動：4前速自動波，前輪驅動
當年車價：約18萬元起
現時二手價：約7萬元起