四名中年男子上月親自將兩隻飼養的狗隻屠宰烹煮，作進補之用，遭警方拘捕，前日上庭接受審訊，承認屠宰狗隻作食物罪名，遭判罰即時入獄30天，成為本地《貓狗條例》立法半世紀以來首宗判監案件。
不少娛樂圈中人均有飼養貓狗寵物，故昨日劏狗食報道被刊登後，眾多藝人均感到極度震驚，Twins、傅明憲和唐寧等眾口一詞指判監30天的懲罰過輕，應加重刑罰阻嚇，名模陳嘉容直斥屠狗黨抵罰，林峯則轟劏狗令人心寒，更形容「食狗肉同食人肉冇分別」。
採訪、攝影：林妃、李珮洳、馬建華
林峯：
應判下半世食齋
「我睇新聞見到啲人咁樣對待啲狗，自己覺得好心寒，啲狗自己養㗎，點食得落呀？食狗肉同食人肉冇分別，因為狗係人類最忠心朋友，好有人性，殺佢同殺人冇分別，所以坐監一個月嘅懲罰輕咗，仲應該要判殺狗食狗嘅人下半世食齋。」
陳嘉容：
食狗行為太殘忍
「劏狗嘅人抵罰，至於係咪判罰過輕就由法官決定，不過係唔可以縱容，因為狗係人類嘅朋友，同傾訴對象，食狗行為太殘忍。
Twins：
好多人挑戰法律
「我哋覺得好多人開始挑戰法律，犯法就一定要罰，一個月真係太少，但我唔知應該罰幾多先啱，我哋認為一定要加強公民教育，由細就要教小朋友要愛護動物、保護環境同埋愛身邊所有人。前排喺雜誌睇到一段內地劏狗場嘅片段，啲狗夾硬俾人扑死，都睇到忍唔住喊。」
宣萱：
希望政府判重啲
「嗰幾個人食番自己養嘅狗好唔啱，因為狗隻好信任自己嘅主人，偏偏劏殺佢嘅係佢主人，好過份，判佢哋坐監希望可以收到阻嚇作用，但如果日後仍有同類事件，希望政府就要再判重啲。」
方中信：
同謀殺有乜分別
「我覺得判罰唔夠，嗰兩隻狗係佢哋自己養，養咗咁耐劏嚟食，同謀殺有乜分別？啲人真係有病，我自己養條魚死咗都唔開心啦，何況係隻狗？香港有咁多嘢唔食，偏偏要食狗肉。今次坐30日監，真係有排佢哋受！不過點都好，今次係第一個案例，可以起到阻嚇作用嘅！」
古天樂：
好殘忍好唔人道
「睇新聞時簡直怒火中燒，好殘忍、好唔人道，又唔知狗有冇細菌，食咗傳狗瘟畀人都有可能發生，狗係人嘅朋友，唔係養嚟食，受法律制裁起碼可以警惕人，我自己好錫狗，睇到咁真係好唔開心、唔舒服。」
滕麗名：
食自己狗好狠心
「佢哋食自己養嘅狗，真係好狠心，我覺得佢呢啲行為好殘忍，判監1個月當係警誡，佢哋又有案底，相信出獄就唔敢喺香港食，可能要返內地食，不過咁做都好唔啱，我唔會鼓吹。」
傅明憲：
應要睇心理醫生
「啲人行為好可恥，簡直係冷血變態殺手，我覺得判監之餘應該加埋罰款，仲要佢哋睇心理醫生，啲人由細睇住啲狗長大，竟然忍心劏咗佢哋嚟食，你話係咪心理變態？」
黃宗澤：
呢啲人直情變態
「刑期判得太少，唔合理，我聽到都谷鬼氣，黐線㗎？唔好養個仔殺咗佢？都係生命嚟㗎，呢啲人嘅做法係冷血都唔能夠形容，直情變態，應該判重啲，同埋判做社會服務令，捉佢為狗做義工。」
唐寧：
判半年至有作用
「呢啲事喺呢個年代唔應該發生，覺得好冷血，判坐監一個月好少，起碼判半年至有阻嚇作用。我覺得嗰班人唔係第一次，知道點樣用火燒狗毛，文明啲啦，好多肉可以食㗎，唔明佢哋四個點落得手，狗係自己養，肯定隻狗行埋佢哋度時仲搖頭擺尾，真係好嬲呀！」
