今年是蘇玉華入行以來最豐收一年，在《美女廚房》烹調美食而榮升廚神的她人氣急升，名利雙收，短短幾個月已多接了十個廣告及數十個宣傳活動和登台等工作，帶來超過300萬「意外之財」。談到廚房效應，蘇玉華表示演戲、下廚跟人生極為相似，放了不同材料和調味品的廚房等於一個人的演藝才能，用甚麼方法去煮去演並不重要，最重要是大家受落，另外還需小心謹慎，否則錯了便不能回頭。 撰文：戴彩煥
抱着玩票性質參加無綫遊戲節目《美女廚房》的蘇玉華，憑中學時上家政課訓練出來的廚藝，成功爆發出連串廚房效應，令她名利雙收。蘇玉華一口氣接拍了健康食品、參茸海味、冬蟲草、按摩椅、煮食爐、煮食煲、焗爐和微波爐等近十多個廣告，又獲出版商邀請推出著作《美味廚房》，其後更接拍賀歲片《心想事成》及廣告配音，加上出席數以十計的活動和登台表演，保守估計，這個廚房效應，已為蘇玉華帶來超過300萬進賬！
入廚 效應超乎想像
對於實際數字，蘇玉華一下子也未能計得清，她笑說：「總之超過七位數字收入啦！呢一連串排山倒海嘅工作，係我始料不及，節目（指《美女廚房》）出街嗰陣我都唔喺香港。總決賽之後，真係帶畀我好多意外收穫，有次我出街，喺洗手間度有個女仔一見到我就叫我廚神，完全冇諗過一個遊戲節目嘅影響力會咁大！今次呢個廚房效應，係我人生中最大一個bonus！」
演藝 輕方法重結果
作為一個演員，引起人注目的，竟不是演技，而是廚藝，那多年來的努力豈非變成白費？對此蘇玉華說：「咁又唔可以咁講嘅，只可以話呢個節目實在太成功，佢完全捉到觀眾心理，拍戲未必有呢樣嘢。」
蘇玉華認為演藝跟下廚道理其實一樣，她說：「有個美國導演講過，每個演員都有自己廚房，每個廚房有唔同材料同調味料，唔需要理會烹調過程，只要煮出嚟好味就得啦！演戲同下廚其實好相似，用自己嘅才能同烹調方式去煮，用乜嘢方法去煮、去演，唔需要理會，只要做出嚟好睇、好味道就得啦，始終每個人嘅潛質唔同，嗰位導演嘅說話，影響得我好緊要。」
人生 要有愛心熱誠
蘇玉華的演技和廚藝均十分了得，多是從日常生活中觀察所得出來，她說：「其實我平時唔多煮嘢，亦冇正式學過烹飪，係讀書時上過家政，對煮嘢食有個概念喺度，得閒嗰陣又會睇吓人哋點煮咁啫。演戲都一樣，日常生活見到嘅嘢，我會記喺腦入面，到有用嘅時候攞番出嚟。自己平時出街會觀察身邊嘅事物，我係一個好奇心幾強、求知慾幾強嘅人！」
由演戲到下廚，由下廚到人生態度，蘇玉華認為三者十分相似，只要行錯一步的話，便會一子錯滿盤皆落索，所以每行一步也要小心謹慎，她說：「不過，人生有好多樂趣，只要經常保持住好奇心同愛心，對生命有活力有熱誠就足夠，做得好唔好都係其次，呢次做得唔好，咪下次再做過囉！」
攝影：陳偉權
化粧：VinciTsang
髮型：RentonHung
場地提供：馬哥孛羅港威酒店
LaBrasserie
