玩盡平安夜：平安夜私P紅白制服誘惑

聖誕節係普天同慶嘅大日子，加上今年百業興旺，股市升到把把聲，人人有錢落袋，使錢真係唔使點諗！平安夜去玩、去蒲已經係指定動作。食完聖誕大餐、再去欣賞燈飾，跟住當然唔少得去吓Party、跳舞、聽歌、飲住酒同一大班知己吹吹水，咁先算真正玩盡平安夜！不過，Party界玩嘅嘢都係十年如一日，咁又點可以滿足到一大班追求新奇刺激嘅朋友呢？今次特別為大家搵來幾個聖誕特別派對，除咗豪飲之外，一樣玩味十足，包唔會悶親你！
記者：羅灝汶
攝影：陳偉強
Model：Bonnie、Ruby、Chrissie、Rubbie、Carol

●除咗一系列名酒提供，都會有雞尾酒畀客人任飲。

●平時去Bar指定動作係玩猜枚同骰盅，呢度一樣可以，加上任飲就更開心。

●轉戰多間蘭桂坊Club嘅DJRay當晚會駐場壓陣。

●場內提供不少有型面具，到場人士亦可自備而來。

紅白美女鬥贏香檳

呢間上樓Privacy搞嘅聖誕Party可謂落足重本，特設全港第一家任飲Moet&ChandonChampagne。而喺平安夜晚，佢哋就玩埋全白DressCode，鼓勵靚女們穿上白色制服誘惑，當晚會選出配襯最出色嘅美女，送出一支價值$5,000大元嘅別注版Moet&ChandonChampagne。至於翌夜聖誕晚就會玩全紅DressCode加面具派對，同樣選出最精心打扮嘅朋友就可以得到豐富獎品。同場更會有DJ打碟，主要播放R&B、Hip-Hop等音樂。

●平時HappyHour大家都可以上嚟唱K。

任飲三千元香檳

講番佢哋特設嘅全場任飲香檳，其實Moet&Chandon係世界知名嘅香檳牌子，為咗方便對甜度喜好不同嘅顧客選擇香檳，香檳瓶身或瓶口處都有BrutImperial字樣，表示甜度較低；如果係NectarImperial（Moet&Chandon專用分類）甜度較高；Dry（Demi-SecorMedium-dry）就是半甜、介於兩者之間。一般Moet&Chandon約$1,300至$3,000不等，而Privacy就全港首次推出聖誕任飲。負責人Donald：「我以前喺各大酒吧、Club都有做過長時間，所以先有渠道攞到呢批酒，加上Privacy開業三個月左右，好想喺聖誕節吸引多啲朋友嚟。」

●全港只有10棵嘅紅色聖誕樹，好有聖誕氣氛。

●別注版Moet&ChandonChampagne是平安夜禮物。（原價：約$5,000）

Privacy（21171393）
地址：銅鑼灣耀華街3號百樂中心22樓
收費：平安夜及聖誕夜
每位收費$400（全場任飲）

配對遊戲勁隊烈酒

除咗紅白聖誕派對之外，一眾單身男、女如果喺聖誕佳節冇人陪都幾慘。唔使煩，ICY王子冰室今年聖誕就搞咗個Dating派對，將一眾單身寂寞男女連繫成一對對！整個派對會用遊戲形式進行，一開始男女客人各自抽出一隻啤牌，相同者就會整晚配成一對，之後就會玩夾生果遊戲。每Pair男女都要先喺BoxA抽出要夾嘅生果，然後再喺BoxB抽出參賽者嘅身體部位，喺一分鐘之內，每組鬥快將所抽到嘅生果由門口送到目的地就會勝出，可以得到神秘大獎。
此外，ICY更特設一項焦點項目，就係設有一間零下20度的房間，並在房內進行瘋狂飲遊戲。每隊有一揸啤酒，男女要合力在最短時間內飲完，最快的前三名，就可獲特別大獎！想喺平安夜認識一下新朋友，相信呢度都係一個不錯選擇啦。

●零下20度要你一下子飲晒咁多酒，一樣都會凍死人㗎。

●玩遊戲之前要靠抽啤牌搵Partner。

●如果抽中合眼緣嘅朋友當然好，相反成晚流流長都有排愁喎。

●玩遊戲要夾生果，男士們識做啦。

●入雪房之前就有皮草任你揀，貪靚嘅靚女就啱晒。

●白酒、紅酒同威士忌綠茶都係免費任飲。

ICY聖誕夜（31881010）
地點：灣仔謝斐道303號王子酒店地下
時間：10:30pm開始（10:3pm-2:30am時段任飲）
收費：男士$348、女士免費

蘭桂坊全線玩Sexy

講到聖誕節好去處又點少得蘭桂坊！今個聖誕節呢個派對勝地一樣有好嘢玩，當中CClub就搞咗一個以「SexyRed」為主題嘅派對，CClub負責人Simon：「其實我哋年年都會有一個主題聖誕派對，今年主要以Sexy打扮同全紅DressCode去吸引女士們入場；另外亦會大玩古典派對裝扮，鼓勵女士們打扮成古典歐陸打扮入場。」另一邊廂，集餐廳、酒吧同Disco於一身嘅Lux，平安夜11:30pm之後就會有DJ打碟，為聖誕節搞氣氛，加上全新三款特製聖誕雞尾酒，食完飯就可以跳舞聽歌，一站式服務，邊一樣最啱你？