莊士機構（367）牛皮橫行接近兩年，現價只係NAV兩折半，港股狂牛，買定博佢爆升。莊士今年9月底NAV2.09元，現價（0.67元）相對折讓近68%，本來已經殘到痹。要咁睇，莊士揸住香港區投資物業，97年狂牛期間，物業估值40億銀，但今年9月底，莊士全部投資物業加埋，賬面值只係得29.8億銀。
再講，莊士近年已少沾手普羅百姓住宅市場，家陣揸住嘅住宅物業或者商廈，位處山頂、深水灣、尖沙嘴及灣仔。呢啲地區物業，全部有價有市，兼炒到飛起。好肯定，莊士嘅投資物業升值，仲未秤夠。以97年基準，莊士NAV可秤到上2.78元，NAV折讓講緊係75.8%，仲唔流口水？以莊士NAV40%起做目標，莊士現價要升到1蚊樓上，以NAV50%做目標，莊士要見1.4元，代表現價翻一番。
中油潔能業績三級跳
中油潔能（260）呢期轉型主打壓縮氣加氣站，06年度中期（6月止）虧轉盈，獲利1460萬銀，對比05年度中期出血1.75億銀，新業務令公司業績三級跳。相信到07年度，純利可上億銀，PE7字頭。
又中油潔能P/B1.6倍，相近嘅股份，P/B全部兩倍樓上，中油追番同類P/B，現價（0.55元）起碼要升20%到0.66元，PE見10倍，要升40%到0.78元。至於摩通所畀嘅目標價，講緊係1蚊樓上。
錢雋