聖誕節假期開始，立法會都開始放假，主席范徐麗泰難得放下工作，噚日就約埋成班立法會記者去佢屋企傾吓偈，預祝聖誕同埋元旦！
范太話就話同記者無所不談，不過佢都揸正嚟做，話明自己係立會主席，要保持政治中立，一切政圈大大小小嘅政治傳聞、小道消息，就唔方便評論，但係講佢自己生活，就冇乜所謂。好似范太話佢今個聖誕假會去湛江、海南島玩，因為佢有個北京朋友喺海南島有間屋，每年冬天會去嗰度住，今年就約埋范太一齊去，不過范太同好多香港人去海南島唔同，佢今次唔係坐飛機去，而係自己揸車去！
原來范太最近買咗架凌志混合燃料車，佢話同前財政司司長梁錦松買嗰架一樣，既然新車落地，就梗係要試真吓部車，所以先大膽諗住由香港揸車去海南島。不過內地撞車黨橫行，報紙都報過，連阿姐汪明荃早排喺大陸開車都幾乎中招，八方梗係問范太擔唔擔心啦！點知范太話冇有怕，萬一唔好彩遇到，一係踏油快過班撞車黨，一係就立刻鎖實車門，等班撞車黨無從入手，再報警求助。八方睇范太真係做足晒準備，去旅行都要安心又放心。
長揸長實同滙豐
范太雖然曾受乳癌困擾，但好番之後，佢嘅身體已冇大礙，所以可以學後生仔咁玩揸車穿州過省自由行。范太講開醫病話，早排有報道講民建聯主席馬力搵到個識少林氣功嘅醫生幫佢醫病，立即「氣」到病除，范太話呢個講法唔係咁正確，因為嗰個醫生有醫過佢，實情對方係一名好厲害嘅解放軍軍醫，不過兼懂少林派氣功；呢位軍醫用中藥夾埋少林氣功，幫馬力打通番晒啲經絡，結果馬力立即藥到病除，聽到范太咁講，真係令八方佩服佩服，怕且中國少林氣功，分分鐘勁過「金刀梁」梁智鴻把金刀！
范太講完旅行、醫病，梗唔少得講埋投資心得。范太話𠵱家個股市係咁升，佢都係睇定少少先，𠵱家佢手上揸住長實同滙豐股票，但范太話明一定唔賣，留番做退休金，范太集中長實、滙豐呢類大藍籌，分分鐘回報好過好多強積金基金！