已故慈善伶王新馬師曾的遺孀祥嫂洪金梅，與四名子女為爭產事件斷絕親情，擾攘10年，終於隨着上月鄧家子女為祥嫂賀壽而畫上句號。前晚是冬至，兆尊竟撇低祥嫂，現身無綫與江欣燕這個假祥嫂錄影節目，還大爆祥嫂近日晚晚致電給他傾偈，又頻頻為他烹調美食，母愛爆棚。
由江欣燕和胡諾言主持的《問題娛樂圈》前晚冬至錄影，請來鄧兆尊、成奎安（大儍）和陳芷菁擔任嘉賓。記者問兆尊會否與祥嫂做冬食飯時，他竟大爆祥嫂瘀事說：「冇，佢打麻雀打到病咗！」
祥嫂上身搞笑
問到兆尊會否待祥嫂康復後再補食飯？他表示暫時不會，並說：「佢近排一得閒就打電話畀我，仲係愈夜愈打嚟嗰種！」那祥嫂致電給他所為何事？兆尊笑道：「咪叫我唔好咁夜，同埋畀嘢我食囉。食乜嘢？總之好嘢啦！」
其時曾扮祥嫂扮得十分神似的江欣燕剛巧路過，她更祥嫂「上身」似的對着兆尊說：「你做乜今晚唔陪我做冬啫？係都要陪個流嘅（指自己）！今年可以返嚟𢭃利是喇，舊年封好晒都冇人拜年！」江欣燕的抵死扮相及精警對白，令兆尊啼笑皆非！
不知舊愛弄璋
早年備受鼻咽癌困擾、經治療後現正康復的大儍，前晚看來減磅不少，他解釋是刻意減肥所致：「我由之前嘅238磅減到𠵱家179磅，為咗身體健康，我戒咗煙，仲早睡早起㖭！」
同場的陳芷菁揚言為了參加《問題娛樂圈》而熟讀近日娛圈八卦新聞，但當記者問她可知道舊愛譚耀文剛為人父時，她竟表示不知情，認真瘀皮。芷菁笑說：「好彩佢喺隔籬台，呢個節目唔會問隔籬台啲問題。其實我好少見阿譚，我冇咗佢電話，不過我都戥佢開心，衷心祝福佢，相信佢係個好爸爸，希望佢多啲錫老婆，因為老婆生BB係好辛苦嘅事。」
採訪、攝影：卓寶花
